The IT Crowd

Hoxe comecei, e rematei, de ver unha serie de televisión británica chamada The IT Crowd, que se estreou o ano pasado cunha tempada de seis capítulos e da que a segunda está a piques de ve-la luz. Pódedela ver, sen precisar descarga, aquí.

Esta serie vai de dous tíos e unha moza que traballan no departamento de informática dunha grande empresa, e onde teñen de desenvolverse nun ambiente onde son marxinados e considerados como "monstruos".

Retrata moi ben as dúas típicas visións que unha persoa normal ten dun informático: o do friki desaliñado e vago, interpretado por Chris O'Dowd; e o friki cerebriño, maxistralmente encarnado por Richard Ayoade. Completa o trío de actores protagonistas Katherine Parkinson, facendo de xefa do departamento que non ten nin idea de informática.

A serie ten os seus momentos graciosos, soltando polos poros o típico humor anglosaxón que ás veces non é de fácil comprensión, máis aínda se temos en conta que polo momento só está dispoñíbel en inglés subtitulado. Porén, a maioría dos chistes informáticos son doados:

- Ola, IT. Probou a apagalo e a encendelo de novo?

Na miña opinión, esta serie está chamada a ser a vindeira serie de culto friki. Abofé.